"

 

 

لاہور:  سپیکر پنجاب اسمبلی ملک محمد احمد خان اور حکومتی اراکین نے موجودہ لوکل باڈیز بل پر تحفظات کا اظہار کر دیا۔ اراکین اسمبلی کا کہنا ہے کہ نیا لوکل گورنمنٹ بل مقامی حکومتوں کو دفن کرنے جا رہا ہے۔ پنجاب اسمبلی کے اجلاس میں پنجاب اینٹی ٹیررازم ترمیمی بل 2025 سمیت 14 بل منظور کر لیے گئے۔ اس کے علاوہ، سانحہ خضدار پر مذمتی قرارداد بھی منظور کی گئی، جو صوبائی وزیر پارلیمانی امور میاں مجتبیٰ شجاع الرحمن نے پیش کی۔ ایجنڈا مکمل ہونے پر پنجاب اسمبلی کا اجلاس غیر معینہ مدت کے لیے ملتوی کر دیا گیا۔  

 

پنجاب اسمبلی کا اجلاس ایک گھنٹہ پچپن منٹ کی تاخیر سے سپیکر ملک محمد احمد خان کی صدارت میں شروع ہوا۔ اجلاس کے دوران محکمہ لوکل گورنمنٹ کے حوالے سے صوبائی وزیر ذیشان رفیق نے سوالات کے جوابات دیے۔ وقفہ سوالات سے قبل سید ذوالقار علی شاہ نے نکتہ اعتراض اٹھاتے ہوئے کہا کہ پاک فوج نے مکار بھارتی فوج کو شکست دی ہے۔ انہوں نے کہا کہ جب پاکستان بنا تو لاکھوں لوگوں نے قربانیاں دیں، اور گزشتہ روز خضدار میں دہشت گردی کے نتیجے میں معصوم بچوں کی شہادت ہوئی ہے۔ ان کا کہنا تھا کہ بھارت غداروں کو پیسے دے کر پاکستان کو دہشت گردی کے ذریعے کمزور کرنے کی کوشش کر رہا ہے۔ انہوں نے ایوان سے اپیل کی کہ اس وقت پاکستان کو ایک مضبوط فوج کی ضرورت ہے، اور تمام قوم کو متحد ہو کر دہشت گردی کے خلاف کھڑا ہونا چاہیے۔  

 

سپیکر ملک محمد احمد خان نے کہا کہ پاک فوج نے بھارت کو ناکوں چنے چبوا دیے ہیں، اور پوری قوم فوج کے ساتھ کھڑی ہے۔ انہوں نے کہا کہ فیلڈ مارشل کا عہدہ بھی افواج پاکستان کو خراج تحسین پیش کرنے کے لیے دیا گیا ہے۔ تاہم، خضدار کے دہشت گردانہ واقعے کے بعد ایوان صدر اور دیگر تقریبات ملتوی کر دی گئی ہیں۔ سپیکر نے اراکین سے ستھرا پنجاب پروگرام کو مزید بہتر بنانے کے لیے اپنا کردار ادا کرنے کی اپیل کی اور کہا کہ یہ حکومت کا ایک انقلابی اقدام ہے جس میں ترقی کا رخ پہلی بار دیہاتوں کی طرف موڑا گیا ہے۔  

 

رکن اسمبلی امجد علی جاوید کے سوال پر سپیکر نے کہا کہ گاڑیوں کے ناکارہ ہونے کے حوالے سے ان کے خدشات درست ہیں، جس پر صوبائی وزیر نے جواب دیا کہ محکمہ لوکل گورنمنٹ میں 2008 کے بعد کوئی نئی گاڑیاں نہیں خریدی گئیں۔ رکن اسمبلی احمد اقبال نے شکایت کی کہ ستھرا پنجاب کے کنٹریکٹرز ان کے حلقے میں تعاون نہیں کر رہے، جس پر صوبائی وزیر نے کہا کہ ستھرا پنجاب پروگرام اب شروع ہوا ہے اور وسائل کا رخ دیہاتی علاقوں کی طرف موڑا گیا ہے۔  

 

لوکل گورنمنٹ بل پر اراکین اسمبلی کے تحفظات ایوان میں گونجنے لگے۔ صوبائی وزیر ذیشان رفیق نے کہا کہ لوکل گورنمنٹ ایکٹ کمیٹی میں زیر غور ہے، لیکن سپیکر نے کہا کہ انہیں خود اس بل پر اعتراض ہے کیونکہ اس میں عوامی نمائندوں کے بجائے ڈی سی کو فوقیت دی جا رہی ہے۔ صوبائی وزیر نے اس بات کو غلط قرار دیتے ہوئے کہا کہ یہ محض ایک غلط فہمی ہے جسے دور کیا جائے گا۔ رکن اسمبلی احمد اقبال نے کہا کہ نیا لوکل گورنمنٹ بل مقامی حکومتوں کو ختم کرنے کی کوشش ہے، جبکہ صوبائی وزیر نے اس بات کو بے بنیاد قرار دیا۔  

 

اپوزیشن کی غیر موجودگی میں ایوان میں سرکاری کارروائی جاری رہی اور 14 بل منظور کر لیے گئے، جن میں اینٹی ٹیررازم ترمیمی بل 2025 بھی شامل تھا۔ صوبائی وزیر پارلیمانی امور میاں مجتبیٰ شجاع الرحمن نے قواعد معطل کرنے کی تحریک پیش کی، جس کے بعد تمام بلز کثرت رائے سے منظور ہو گئے۔  

 

سانحہ خضدار پر مذمتی قرارداد میں دہشت گردی کی شدید مذمت کی گئی اور دہشت گردوں کو کیفرِ کردار تک پہنچانے کا مطالبہ کیا گیا۔ صوبائی وزیر اطلاعات عظمیٰ زاہد بخاری نے کہا کہ یہ حملہ بھارت کی پراکسی جنگ کا حصہ ہے، جس میں معصوم بچوں کو نشانہ بنایا گیا۔ انہوں نے کہا کہ وزیر اعلیٰ پنجاب نے وزیر اعلیٰ بلوچستان سے رابطہ کر کے تعزیت اور تعاون کی یقین دہانی کرائی ہے۔ انہوں نے زور دیا کہ آپریشن ضربِ عضب جاری رہنا چاہیے تاکہ دہشت گردوں کا خاتمہ کیا جا سکے۔  

 

اجلاس کے اختتام پر ایجنڈا مکمل ہونے پر پنجاب اسمبلی کا اجلاس غیر معینہ مدت کے لیے ملتوی کر دیا گیا۔