لاھور : مجوزہ پنجاب لوکل گورنمنٹ بل پر جنرل سیکرٹری پیپلز پارٹی وسطی پنجاب سید حسن مرتضی نے اظہار تشویش کرتے ہوئے کہا ہے کہ بل میں بلدیاتی نمائندوں کو نوکر شاہی کا غلام بنا دیا گیا ہے،ڈپٹی کمشنر کو اختیارات کا گھنٹہ گھر بنانا مقامی نظام کی نفی ہے۔انہوں نے بتایا کہ ڈی سی کے اختیارات کو چیک کرنے کیلئے کوئی منتخب نمائندہ موجود نہیں ہوگا اوراختیارات کی نچلی سطح تک آپشنل منتقلی صوبائی حکومت کی مرضی پر ہو گی۔پیپلز پارٹی کے جنرل سیکرٹری نے زور دیکر کہا کہ یہ بل پاکستان کے آئین کے آرٹیکل 140-A کے متصادم ہے جس کے تحت ڈی سی حلقہ بندیوں پر بھی اثر انداز ہونگے۔ا نہوں نے واضح کیا کہ اس قانون سازی کا اصل مقصد مخالف سیاسی جماعتوں کے عوامی نمائندوں کو بے اختیار کرنا ہے۔انہوں نے کیا کہ ن لیگ لولہا لنگڑا بل لا کر مقامی حکومتیں قائم کرنیکا تاثر دینا چاہتی ہے،پیپلز پارٹی بااختیار عوامی نمائندوں کے بغیر لوکل گورنمنٹ بل قبول نہیں کریگی۔