اسلام آباد (30 مئی، 2025): صدر مملکت آصف علی زرداری نے بلوچستان اور خیبر پختونخوا میں بھارتی پراکسی دہشتگرد گروہوں کے خلاف سکیورٹی فورسز کی کامیاب کارروائیوں پر خراج تحسین پیش کیا ہے۔ انہوں نے دہشتگردی کے مکمل خاتمے تک ایسی کارروائیاں جاری رکھنے کے عزم کا اعادہ کیا اور پوری قوم کو اپنی سیکیورٹی فورسز کے ساتھ متحد پایا۔

صدر مملکت نے خصوصاً بلوچستان میں انٹیلی جنس پر مبنی دو مختلف آپریشنز کے دوران "فتنۂ ہندوستان" کے پانچ دہشتگردوں کو جہنم واصل کرنے پر سکیورٹی فورسز کی بہادری اور کارکردگی کو سراہا۔ انہوں نے ملک سے بھارتی اسپانسرڈ دہشتگردی کے اس مکروہ چہرے کے مکمل خاتمے پر اپنے پختہ عزم کا اظہار کیا۔

صدر زرداری نے خیبر پختونخوا میں "فتنۂ خوارج" کے خلاف دو مختلف کامیاب کارروائیوں پر بھی سکیورٹی فورسز کو مبارکباد دی۔ ان کارروائیوں کے دوران سات خوارج دہشتگرد ہلاک ہوئے۔ صدر مملکت نے واضح کیا کہ پاکستان کی بہادر افواج بھارتی پراکسی فتنۂ خوارج کی سرکوبی کے لیے کامیاب کاروائیاں کررہی ہیں۔

صدر مملکت نے شمالی وزیرستان میں ہونے والی کارروائی کے دوران جام شہادت نوش کرنے والے چار بہادر جوانوں کو خراج عقیدت پیش کیا۔ ان شہداء کے نام یہ ہیں: لیفٹیننٹ دانیال اسماعیل، نائب صوبیدار کاشف رضا، لانس نائیک فیاقت علی اور سپاہی محمد حمید۔ صدر زرداری نے شہداء کی بے مثال قربانی، جذبہ حب الوطنی اور بہادری کو سراہتے ہوئے کہا کہ وطن کے لیے جان کا نذرانہ پیش کرنے والے یہ بہادر سپوت قوم کے ہیرو ہیں۔ انہوں نے شہداء کیلئے بلندی درجات اور ان کے اہل خانہ کیلئے صبر جمیل کی دعا کی۔

صدر آصف علی زرداری نے اپنے بیان میں زور دے کر کہا کہ سکیورٹی فورسز دہشتگردی کے عفریت کے خاتمے کے لیے کاروائیاں کر رہی ہیں۔ انہوں نے یقین دلایا کہ دہشتگردی کے مکمل خاتمے تک "فتنۂ ہندوستان" اور "فتنۂ خوارج" جیسے بھارتی پراکسی گروہوں کے خلاف کارروائیاں مسلسل جاری رہیں گی۔ صدر مملکت نے تاکید کی کہ پوری قوم دہشتگردی کے خلاف جنگ میں اپنی سیکیورٹی فورسز کے ساتھ متحد و یکجان ہے اور قوم اپنے محافظوں کی قربانیوں کو ہمیشہ یاد رکھے گی۔