اسلام آباد – پاکستان پیپلز پارٹی کی رہنما اور رکن قومی اسمبلی سحر کامران نے شہید محترمہ بینظیر بھٹو کی 72ویں سالگرہ کے موقع پر سوشل میڈیا پلیٹ فارم ایکس (سابقہ ٹوئٹر) پر ایک پراثر پیغام جاری کرتے ہوئے انہیں زبردست خراجِ عقیدت پیش کیا۔

سحر کامران نے 18 جون 2007 کا ذکر کیا جب شہید بینظیر بھٹو نے جلاوطنی ختم کرنے سے قبل عمرہ ادا کیا۔ انہوں نے بتایا کہ مکہ مکرمہ جاتے ہوئے شہید بی بی نے پاکستان کی معاشی بحالی اور نوجوانوں کے لیے ہنر سازی کے مواقع کی اہمیت پر بات کی۔ ان کے الفاظ تھے: “عوام کو مجھ سے بہت امیدیں ہیں، وہ کہتے ہیں 'بینظیر آئے گی، روزگار لائے گی'۔ ہم سب کو نوکریاں نہیں دے سکتے، لیکن نوجوانوں کو باعزت روزگار کے لیے ہنر دینا ضروری ہے۔”

سحر کامران نے صدر مملکت آصف علی زرداری اور خاتونِ اول آصفہ بھٹو زرداری کی جانب سے ایوانِ صدر میں بینظیر ہنر مند رجسٹریشن پورٹل کے افتتاح کو شہید بی بی کے وژن کی عملی تکمیل قرار دیا۔ یہ پورٹل بینظیر انکم سپورٹ پروگرام (BISP) کے تحت نوجوانوں کو جدید ہنر سکھانے اور باوقار روزگار کے مواقع فراہم کرنے کے لیے بنایا گیا ہے۔

انہوں نے چیئرپرسن BISP سینیٹر روبینہ خالد، نایاب جان  اور تمام ٹیم کو اس سنگِ میل کی کامیاب تکمیل پر مبارکباد دی۔

سحر کامران نے کہا کہ “شہید بی بی کا ایک اور خواب حقیقت بن رہا ہے۔” یہ اقدام ان کے چھوڑے گئے وژن اور ترقی کے نقشِ قدم کی روشن علامت ہے۔