لاہور – پیپلز پارٹی کے مرکزی سیکرٹری اطلاعات و سینئر رہنما ندیم افضل چن سے پنجاب سیکرٹریٹ میں پیپلز لائرز فورم پنجاب کے سیکرٹری اطلاعات عظیم حفیظ اور پیپلز لائرز فورم گوجرانوالہ ڈویژن کے صدر شہزاد عرفان نے اہم ملاقات کی۔

اس موقع پر پی پی ۵۲ کے ضمنی انتخاب میں جماعت کے امیدوار راحیل کامران چیمہ کے حوالے سے تفصیلی تبادلہ خیال کیا گیا۔ پیپلز لائرز فورم کے نمائندوں نے واضح کیا کہ وہ پی پی ۵۲ کے ضمنی انتخاب میں پیپلز پارٹی کی مہم کو بھرپور طریقے سے سپورٹ کریں گے اور انتخابی سرگرمیوں میں فعال کردار ادا کریں گے۔

ندیم افضل چن نے اس تعاون کو خوش آئند قرار دیتے ہوئے کہا کہ وکلاء برادری کا مضبوط ساتھ عوامی اعتماد بڑھانے میں کلیدی حیثیت رکھتا ہے۔ انہوں نے پیپلز لائرز فورم کے ارکان کی خدمات کو سراہا اور کہا کہ مل کر ہر محاذ پر عوامی مسائل کے حل اور پارٹی کی سربلندی کے لیے کوشاں رہیں گے۔